Зайлшгүй мэдэх шаардлагатай менежментийн таван шинэ хэмжүүр

by James Slavet

Олон жилийн хугацаанд ажигласны үр дүнд сайн удирдах захирлын эхлэлийг хэмжих хэмжүүр нь орлого эсвэл санхүүгийн аль нэг тайлангуудаас хэний ч уншиж чаддагггүй мэдээллийг олох явдал гэдгийг харсан юм.

“Хэрэв та тооцоолж чаддаг бол удирдаж ч бас чадна” гэдэг үг бизнесийн зах зээлийг тодорхойлохоо аль хэдийн больжээ. Өөрөөр хэлбэл менежерүүд, удирдагчид орцыг биш зөвхөн гарцыг тооцдог. Яг л теннисийн багийн дасгалжуулагч хэрхэн цохиураа оновчтой, хүчтэй савах, бөмбөгийг хэрхэн удирдахыг зааж, сургахын оронд илүү их оноо ав хэмээн тушаахтай ижил зүйл болоод байгаа юм. Ихэнх компани энгийн үйл ажиллагаагаа хэрхэн сайжруулахаа ярилцаж, хэлэлцээгүй байж дэд бүтэц, нийт орлого, нийт зардал гэх мэт шууд том хэмжээний үр дүнд үнэлэлт өгч, шийдвэрүүдийг гаргаж эхэлдэг. /Жижиг хэмжээний асуудлууд гэдэгт уулзалтуудыг хэрхэн үр өгөөжтэй болгох, техник технологийн бүтээмжийг хэрхэн илүү сайн нэмэгдүүлэх гэх мэт зүйлүүд орно./

Дараах таван хэмжигдэхүүнийг сайн менежментийн баг зайлшгүй тооцож сурах хэрэгтэй:

Хэмжүүр 1: Хэвийн урсгалын хувь хэмжээ

Ажилчид ажлын цагын үеэр хүнтэй уулзах, мессеж бичих, хэн нэгэн ажилчинтай дэмий зүйл ярих, интернетээр хэсэх гэх мэт байнга завсарлага авдаг. Энэхүү завсарлага нь “ урсгалын байдал” – аас гаргаж судалгаа шинжилгээ, хөгжлийн мөчлөгийг нэмэгдүүлдэг бөгөөд үр дүнгүй зарцуулагддаг. Программчид ба оюуны хөдөлмөр эрхэлдэг ажилчид хамгийн сайндаа нийт ажлын цагын 30%-50%-ийг яг завсарлахгүй, ажилдаа төвлөрч өнгөрүүлдэг гэсэн судалгаа гарсан. Юу гэж хэлэх гээд байна вэ гэвэл ажил дээр байгаа дэмий өнгөрүүлэх цагыг багасгах арга хэмжээг байгууллагын удирдлагууд зайлшгүй авах хэрэгтэй. Жишээ нь уулзалтгүй өдрийг бий болгох, эсвэл хүмүүс яг ажил хийж байх үедээ “ Яг одоо хэнтэй ч ярилцах боломжгүй” гэсэн утгатай цаас хаалга дээрээ наах гэх мэт аргуудыг хэрэгжүүлж болно.

Хэмжүүр 2: Сэтгэлийн зовлон ба уйтгар гуниг хоёрын уялдаа холбоо

Нэлээд хэдэн жилийн өмнө би залуу, халуун байхдаа эхнэртэйгээ хамт салса бүжгээр хичээллэдэг байлаа. Тэр үед бүжгийн багшийн хэлсэн нэг үг огт санаанаас гардаггүй юм. “Миний зорилго бол бүх суралцагчдынхаа сэтгэл дотор буй зовлон ба айдас түгшүүрийн тэнцвэрийг хадгалах” хэмээн хэлсэн. Өөрөөр хэлбэл бид хэт их сэтгэлээр унаж, цөхөрч болохгүй. Энэ нь биднийг уналтад оруулж, эцэс сүүлдээ бид бууж өгөх замыг сонгодог. Гэхдээ хэт их сэтгэл амар, аливаа зүйлд санаа зовох зүйлгүй байж болохгүй. Бид өөрсдийгөө сорьсон, түүндээ эрчлэгдэж улам тэмүүлэх тийм л амьдралын хэмнэлтэй байх хэрэгтэй. Мэдээж өөрөө ч гүйцэж чадахгүй тийм амьдралын хэмнэлийн талаар энд ярьсангүй. Багшийн бүжгийн хичээл биднийг тэлэх, хатуужуулах зорилготой байсан тул нэлээдгүй хүнд байсан. Гэвч хэн ч тэр ангиас бууж өгч гарч яваагүй. Үүнд л түүний удирдах ур чадвар байгаа юм. Дээрх жишээтэй ижилээр хүмүүсийн сэтгэлийн зовлон ба уйтгар гунигыг ашиглан удирдах боломжтой. Маш сайн гүйцэтгэлтэй хүн хурдан уйддаг бөгөөд үргэлж л тэднийг сорих, хөгжүүлэх хүнд даалгаваруудыг хүлээж байдаг. Бизнесийн байгууллагын хувьд та тодорхой давтамжтайгаар ажилчдаа ажиглаж сэтгэл санаа дээрх хоёрын аль дээр илүү их тогтож байгааг мэдэх нь чухал. Хэрэв тэдний эрч хүч сул эсвэл орой ирж, эрт тараад байвал тэд ажлаасаа уйдсан гэсэн үг. Хэрэв тэд жоохон бүтэлгүйтэлд уурлаж, сэтгэлээр унах, эсвэл урт хугацаагаар өвдөөд байвал магадгүй та тэднийг хэтэрхий их хүчлээд байгаа байх.

Хэмжүүр 3: Хурлыг идэвхжүүлэгч

Ихэнх хуралууд хэрэггүй зүйл болж өнгөрдөг. Мөн маш өндөр зардалтай байдаг. АНУ-д гэхэд л зургаан програмын инженерийн нэг цагийн хурлын зардал доод тал нь 1,000 ам.доллар байдаг. Хэн ч уулзалтыг илүү энгийн үр дүнтэй болгох талаар шинэ санаа гаргаж хэрэгжүүлдэггүй. Хурлын сүүлийн хэдэн минутанд хуралд оролцогчидоос хурал хэр үр дүнтэй болсон талаар санал асуулга явуулж, илүү сайжруулах талаар санал солилцдог. Энэ зүгээр л нэг цаасны өөдөс эсвэл энгийн веб дээрх санал асуулга маягаар явагдаж болно шүү дээ. Хурлыг хэрхэн амжилттай, үр бүтээлтэй явуулах талаар зарим оновчтой санааг Верне Харниш / Verne Harnish / дэвшүүлсэн.

Хэмжүүр 4: Долоо хоног бүр шинэ зүйлийг сурах харьцаа

Гурван настай хүү минь надаас “туршлага” гэж юу гэсэн үг вэ хэмээн асуулаа. Хүүдээ энэхүү үгийг тайлбарлаж дуусмагч толгойгоо дохиод “ тэгвэл би супер баатар болоход одоохондоо хангалттай туршлагатай болоогүй юм байна тээ ааваа ?” хэмээн асууж билээ. Шилдэг удирдагчид байнга сониуч занг эрэлхийлж байдаг. Жой Ито саяхан “насанд хүрэгчид хүүхдийн зарим онцлог шинжүүдийг хадгалж үлдэх хэрэгтэй. Жишээ нь хүүхдүүд гурав эсвэл дөрвөн настай үедээ шургуу суралцаж, үргэлж өөрийнхөө биеэс ахадсан зүйлийг мэдэхийг мэрийж, сонирхдог.” хэмээн бичжээ. Энэхүү зуршлыг та компанидаа бий болгохын тулд дараах асуултыг багийнхнаасаа асуугаад үзээрэй: Та яаж 1% -ийн өсөлтийг энэ долоо хоногт бий болгож чадав? Та үйлчлүүлэгчдээсээ ямар нэг онцгой зүйл сурсан уу? Эсвэл бүтээгдэхүүнийг илүү сайн болгох шинэ санаа сэдэж олсон уу? .... Эдгээр асуултууд танай багт бүтээлч чанар, шинэ ажлын хэмнэлийг бий болгох бөгөөд магадгүй долоо хоног бүр 1%-ийн өсөлттэй ажилладаг болох ч юм билүү.

Хэмжүүр 5: Эерэг эргэх холбооны харьцаа

Жохн Кеннеди Жохн Готтманаас маш их зүйлийг сурч гайхалтай илтгэгч болсон шиг та ч гэсэн Готтманаас суралцаж яагаад болохгүй гэж? Готтман нь сэтгэл судлаач бөгөөд “Гэрлэлт яагаад амжилттай эсвэл бүтэлгүй болдог вэ” хэмээх номын зохиогч юм. Тэрээр сайхан амьдарч байгаа гэр бүлийн хувьд сөрөг харилцаанаасаа 5 дахин илүү эерэг, халуун дулаан харилцааг бий болгосон байдаг хэмээсэн бөгөөд (5:1) гэсэн харьцааг судалгааныхаа үр дүнд гаргасан байна. Хэрэв хосуудын харилцаанд энэхүү харьцаа алдагдаад буюу буураад эхэлбэл тэд хагаралддаг байна. Ажил дээр ч гэсэн яг ийм л байдаг. Хүмүүсийн хийж буй сайн үйлдлүүдийг алдалгүй харж бай. Сайн үйлдлийг нь магтаан сайшаасан үгийг хэлэх боломжыг бүү алд, яг л хэн нэгний жижигхэн тэнэг үйлдлийг маш хурдан олж хардаг шиг. Тэгээд та энэхүү эргэх холбоог эргэн тойрны хүмүүстээ халдаа. Мэдээж ажил дээр 5:1 харьцааг барихад хэцүү боловч та илүү халамжтай, сайхан сэтгэлтэй байх гээд хичээгээд үзээрэй.

За тэгэхээр сая та компанид хэзээ ч хэрэгждэггүй 5 хэмжүүрийгг мэдэж авлаа. Энэхүү 5 хэмжүүрийг бий болгож, хэрэгжүүлэх зам тийм ч амар байхгүй. Гэхдээ энэ үнэхээр үр дүнгээ өгдөг юм шүү.

Эх сурвалж : www.forbes.com

34 Сэтгэгдэлтэй “Зайлшгүй мэдэх шаардлагатай менежментийн таван шинэ хэмжүүр”